रुकुम पश्चिम जिल्ला कर्णाली प्रदेशको एक मध्ये– पहाडी जिल्ला हो । यस जिल्लाको पूर्वमा रुकुम पूर्व, पश्चिममा जाजरकोट, उत्तरमा डोल्पा र दक्षिणमा सल्यान र रोल्पा जिल्लाहरु रहेका छन । नेपालको मानचित्रमा हेर्दा २८ डिग्री २९ मिनेट उत्तरी अक्षांस र ८२ डिग्री २९ मिनेट पुर्वी देशान्तरको बिचमा अवस्थित छ । भौगोलिक हिसाबले समुन्द्र सतह देखी दक्षिणमा ७३२ मि. (चौरजहारी फाँट ) देखि उत्तरमा ६७२० मि. (चित्रेपाटन) को उचाई सम्म फैलिएको यस जिल्लाको जम्मा क्षेत्रफल १२१३।४९ वर्ग कि.मि. रहेको छ । हावापानीको आधारमा यस जिल्लामा उपोष्ण Sub-Tropical देखी शितोष्ण Temperate प्रकृतिको हावापानी पाइन्छ । विकास निर्माणको हिसाबले विगतका दशकहरुमा पिछडिएको भएता पनि यो जिल्ला पछिल्ला वर्षहरुमा विकासको गति तिब्र हिसाबले बढि रहेको छ । यस जिल्लाका अधिकांश मानिसहरु वन श्रोतहरुमा निर्भरता रहेको भएता पनि पछिल्ला वर्षहरुमा वैदेशिक रोजगारीका साथै रोजगारीका विकल्पहरु बढेसँगै वन श्रोतहरुमा निर्भरता महसुश गर्न सकिन्छ । तथापि विकास निर्माणका कार्यहरुको तिब्रताको कारणले गर्दा प्राकृतिक श्रोतहरुमा चाप भने बढिरहेको देखिन्छ ।

पर्यावरणिय हिसाबले रुकुम पश्चिज जिल्लामा अत्यधिक मात्रामा विविधता रहेको पाइन्छ । समुन्द्र सतह देखी १००० मि. भन्दा तल्लो भाग देखी करिब ६७०० मि.सम्मको उचाईको विविधता कायम रहेको कारण समेत रुकुम पश्चिम जिल्लामा उपोष्ण देही शितोष्ण प्रकारको वन रहेका पाइन्छ । डोबे्रमेज र शाक्य (१९७५) ले हावापानी र पारिस्थितिकिय पद्धतिको आधारमा गरेको वर्गिकरण अनुसार रुकुम पश्चिम जिल्लाको वन क्षेत्रलाई जम्मा ९ प्रकारमा विभाजन गर्न सकिन्छ जसमा ८ प्रकारका वन तथा १ प्रकारको हिम क्षेत्र रहेको छ । समुन्द्र सतहदेखीको उचाई र हावापानीको आधारमा यस जिल्लाको वनलाई निम्नबमोजिम वर्गिकरण गरिएको छ ।

वन श्रोतको हिसाबले यस जिल्लाको मुख्य वन उपोष्ण खोटे सल्लाको वन हो । यस जिल्लाको सबैभन्दा ठुलो क्षेत्र सल्लाको वनले ढाकिएको छ । जिल्लाको तल्लो भागमा भने पहाडि सालको वन रहेको पाइन्छ भने माथिल्लो भागमा देवदार सल्लो, खस्रु, बाँझ, गुराँस लगायतका प्रजातीको वाहुल्यता रहेको पाइन्छ । जैविक विविधताको हिसाबले सानीभेरी गाउँपालिका र आठविसकोट नगरपालिकामा पर्ने मौराखारा वन क्षेत्र, आठविसकोट नगरपालिका अन्तरगत झारमारे क्षेत्र, र चित्रेपाटन क्षेत्र, मुसिकोट नगरपालिकाको साँख र घोरखानी क्षेत्र महत्वपुर्ण क्षेत्रका रुपमा रहेका छन ।